1Cor 16 | NdeIBE | STEP | Mayelana lomnikelo onikelelwa abantu bakaNkulunkulu: Yenzani lokhu engatshela amabandla aseGalathiya ukuba akwenze.

1 Corinthians 16

Umnikelo Onikelelwa Abantu BakaNkulunkulu

1 Mayelana lomnikelo onikelelwa abantu bakaNkulunkulu: Yenzani lokhu engatshela amabandla aseGalathiya ukuba akwenze. 2 Ngosuku lwakuqala maviki wonke, yilowo lalowo wenu kabeke eceleni imali ethile kusiya mayelana leholo lakhe, ayigcine, ukuze kuthi ekufikeni kwami kungabi lokuqoqa okwenziwayo. 3 Ngakho-ke ekufikeni kwami ngizabapha izincwadi zokubabika labobantu elibakhethileyo ngibathume eJerusalema lesipho senu. 4 Kungabonakala kufanele ukuba ngihambe labo, bazangiphelekezela.

Izicelo ZikaPhawuli

5 Sengidlule eMakhedoniya ngizakuza kini – ngoba ngizadlula eMakhedoniya.

6 Mhlawumbe ngizahlala lani okwesikhatshana, kumbe ubusika bonke, ukuze lingisize ohambeni lwami, ezindaweni zonke engiya kuzo.

7 Kangifisi ukulibona khathesi ngilethekela okwesikhatshana nje; ngithemba ukuhlala lani okwesikhathi esithile, uma iNkosi ivuma.

8 Kodwa ngizahlala e-Efesu kuze kufike iPhentekhosti, 9 ngoba ngivulelwe umnyango omkhulu womsebenzi ophumelelayo, njalo banengi abangiphikisayo.

10 UThimothi angafika, libone ukuthi akulalutho alwesabayo eseselani, ngoba uqhubeka ngomsebenzi weNkosi, njengami.

11 Ngakho akungabi lomuntu owalayo ukumamukela. Medluliseni ngokuthula ohambeni lwakhe ukuze abuye kimi. Ngimlindele yena labazalwane.

12 Mayelana lomzalwane wethu u-Apholo: Ngamncenga kakhulu ukuba eze kini labazalwane. Ubengafisi ukuhamba khathesi, kodwa uzahamba lapho eselethuba.

13 Lindanini; qinani ekukholweni kwenu; libe ngabantu abalesibindi, wobani lamandla.

14 Yenzani konke ngothando. 15 Liyakwazi ukuthi abendlu kaStefana baba ngamakholwa akuqala e-Akhayiya, njalo sebazinikela emsebenzini wabangcwele. Ngiyalincenga, bazalwane,

16 ukuba lizinikele kwabanjengalaba lakubo bonke abahlanganyela emsebenzini basebenze khona. 17 Ngathokoza ekufikeni kukaStefana loFothunathu kanye lo-Akhayikhu, ngoba balethe obekusilela kuvela kini. 18 Ngoba bavuselela umoya wami kanye lowenu. Abantu abanjalo bafanele ukuqakathekiswa.

Ukuvalelisa

19 Amabandla asesifundeni sase-Asiya ayalibingelela. U-Akhwila loPhrisila ngokuthaba eNkosini bayalibingelela, lenza njalo lebandla elihlanganela endlini yabo. 20 Bonke abazalwane abalapha bayalibingelela. Bingelelanani ngokwangana okungcwele.

21 Mina, Phawuli, ngiloba ukubingelela lokhu ngesami isandla.

22 Uma umuntu engayithandi iNkosi – kehlelwe yisethuko. Woza, awu Nkosi!

23 Umusa weNkosi uJesu kawube lani.

24 Uthando lwami kini lonke kuKhristu uJesu. Ameni.